1391. Oktober 29. Rome

Bonifacius episcopus, servus servorum dei Venerabilibus fratribus . . Archiepiscopo Gneznensi et.. Episcopo Wratislauiensi, ac dilecto filio.. Abbati Monasterii Brewnouiensis extra muros Pragenses, Salutem et apostolicam benedictionem, Militanti ecclesie licet immeriti disponente domino presidentes, circa curam ecclesiarum et Monasteriorum omnium solertia reddimur indefessa soliciti, ut iuxta debitum pastoralis officii eorum occurramus dispendiis et profectibus divina cooperante dementia salubriter intendamus. Sane dilecti filii . . Prepositi, et dilectarum in Cristo filiarum . . Priorisse et Conventus Monasterii Czarnawans alias Domus dei prope Opul, per Prepositum et Priorissam soliti gubernari, Premonstratensis ordinis Wratisl. dioc. conquestione percepimus, quod nonnulli . . Archiepiscopi . . episcopi aliique ecclesiarum prelati et clerici ac ecclesiastice persone tam religiose quam seculares, nec non Duces, Marchiones, Comites, Barones, Nobiles, Milites et laici, Communia Civitatum, Universitates Opidorum, Castrorum, Villarum et aliorum locorum, et alie singulares persone, Civitatum diocesium et aliarum partium diversarum, occuparunt et occupari fecerunt Castra, Villas et alia loca, terras, domos, possessiones, iura et iurisdictiones, necnon fructus, census, redditus et proventus dicti Monasterii, et nonnulla alia bona mobilia et immobilia, spiritualia et temporalia, ad Prepositum, Priorissam et Conventum ac Monasterium predicta spectantia, et ea detinent indebite occupata seu ea detinentibus prestant auxilium, consilium vel favorem. Nonnulli etiam Civitatum, diocesium et partium predictarum qui nomen domini in vacuum recipere non formidant, eisdem . . Preposito . . Priorisse et Conventui super predictis Castris, Villis et locis aliis, terris, domibus, possessionibus, iuribus, iurisdictionibus, fructibus, censibus, redditibus et proventibus eorundem et quibuscunque aliis bonis mobilibus et immobilibus, spiritualibus et temporalibus, ac aliis rebus ad eosdem Prepositum, Priorissam et Conventum spectantibus multiplices molestias et iniurias inferunt ac iacturas. Quare dicti Prepositus, Priorissa et Conventus nobis humiliter supplicarunt, ut cum eisdem valde reddatur difficile pro singulis querelis ad apostolicam sedem habere recursum, providere ipsis super hoc paterna diligentia curaremus. Nos igitur adversus occupatores, detentores, presumptores, molestatores et iniuriatores huiusmodi, illo volentes eisdem Preposito, Priorisse et Conventui remedio subvenire, per quodipsorum compescatur temeritas et aliis aditus committendi similia precludatur, discretioni vestre per apostolica scripta mandamus, quatinus vos vel duo aut unus vestrum per vos vel alium seu alios, etiam si sint extra loca in quibus deputati estis Conservatores et Iudices, prefatis Preposito, Priorisse et Conventui efficacis defensionis presidio assistentes non permittatis eosdem super hiis et quibuscunque aliis bonis et iuribus ad Prepositum, Priorissam, Conventum ac Monasterium predicta spectantibus ab eisdem vel quibusvis aliis indebite molestari vel eis gravamina seu damna vel iniurias irrogari, facturi dictis Preposito, Priorisse et Conventui, cum ab eis vel procuratoribus suis aut eorum aliquo fueritis requisiti, de predictis et aliis personis quibuslibet super restitutione huiusmodi Castrorum, Villarum, terrarum et aliorum locorum, iurisdictionum, iurium et bonorum mobilium et immobilium, reddituum quoque ac proventuum et aliorum quorumcunque bonorum, necnon de quibuslibet molestiis, iniuriis atque damnis presentibus et futuris, in illis videlicet que iudicialem requirunt indaginem summarie de piano sine strepitu et figura iudicii, in aliis vero prout qualitas, eorum exegerit, iustitie complementum, occupatores seu detentores, presumptores, molestatores et iniuriatores huiusmodi necnon contradictores quoslibet et rebelles cuiuscunque dignitatis, status, gradus, ordinis vel conditionis extiterit, quandocunque et quotienscunque expedierit, auctoritate nostra per censuram ecclesiasticam appellatione post posita compescendo, Invocato ad hoc si opus fuerit auxilio brachii secularis. Non obstantibus tam felicis recordationis Bonifatii pape VIII. predecessoris nostri, in quibus cavetur ne aliquis extra suam Civitatem et Diocesim nisi in certis exceptis casibus, et in illis ultra unam dietam a fine sue diocesis ad iudicium evocetur, Seu ne Iudices et Conservatores a sede deputati predicta extra Civitatem et Diocesim in quibus deputati fuerint, contra quoscunque procedere sive alii vel aliis vices suas committere, aut aliquos ultra unam dietam a fine diocesis eorundem trahere presumant, dummodo ultra duas dietas aliquis auctoritate presentium non trahatur, Seu quod de aliis quam de manifestis iniuriis et violentiis et aliis que iudicialem requirunt indaginem, penis in eos si secus egerint et in id procurantes adiectis, Conservatores se nullatenus intromittant, quam aliis quibuscunque Constitutionibus a predecessoribus nostris Romanis pontificibus tam de iudicibus delegatis et Conservatoribus, quam personis ultra certum numerum ad iudicium non vocandis et aliis editis, que vestre possent in hac parte iurisdictioni aut potestati eiusque libero exercitio quomodolibet obviare. Seu si aliquibus communiter vel divisim a predicta sit sede indultum, quod excommunicari, suspendi vel interdici aut extra vel ultra certa loca ad iudicium evocari non possint per litteras apostolicas non facientes plenam et expressam ac de verbo ad verbum de indulto huiusmodi et eorum personis, locis, ordinibus et nominibus propriis mentionem, et qualibet alia indulgentia dicte sedis generali vel spetiali cuiuscunque tenoris existat, per quam presentibus non expressam vel totaliter non insertam vestre iurisdictionis explicatio in hac parte valeat quomodolibet impediri, et de qua cuiusque toto tenore de verbo ad verbum in nostris litteris habenda sit mentio specialis. Ceterum volumus et apostolica auctoritate decernimus quod quilibet vestrum prosequi valeat articulum etiam per alium inchoatum, quamvis idem inchoans nullo fuerit impedimento Canonico prepeditus, Quodque a dato presentium sit vobis et unicuique vestrum in premissis omnibus et eorum singulis, ceptis et non ceptis, presentibus et futuris, perpetuata potestas et iurisdictio attributa, ut eo vigore eaque firmitate possitis in premissis omnibus ceptis et non ceptis et pro predictis procedere, ac si predicta omnia et singula coram vobis cepta fuissent, et iurisdictio vestra et cuiuslibet vestrum per citationem vel modum alium perpetuata legitimum extitisset. Constitutione predicta super Conservatoribus et alia qualibet in contrarium edita non obstante. Presentibus post Quinquennium minime valituris. Datum Rome apud Sanctumpetrum IIII. Kal. Novembris, Pontificatus nostri Anno Secundo.
Registrata gratis.
M. de Cherubinis.

Die Bleibulle ist verloren.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 1, Urkunden des Klosters Czarnowanz. Hrsg von dr W. Wattenbach, Breslau 1857.